Það eru til um 250 hestategundir í öllum heiminum. Íslenski hesturinn og reiðmennska sem við þekkjum er bara brot af hestaheiminum.  Fjölbreytileikinn er mikill.  Mikill munur getur verið á stærð, útliti og gerð hestsins. 

Til eru hestar sem geta verið allt að tveir metrar á herðarkamb eins og "Shire" hesturinn og svo eru aðrir sem eru á stærð við meðalstóran hund eins og "Falabella".

Margir hestar í heiminum hafa þróast út frá svipuðum tegundum, en ræktunarval, áherslur, veðurfar, landslag og fóður hefur einnig haft áhrif á þróun nýrra tegunda. Hestategundir hafa þróast mismunandi eftir svæðum, bæði vegna landslags, hitastigs, en einnig af áhrifum mannsins, sem velur saman hross til að rækta,  sem eru líklegust til að ná fram ákveðnum eiginleikum sem hafa verið taldir góðir og æskilegir, eins og ganglag, hreyfingar eða ákveðin útlitseinkenni, litir, geðslag o.fl.

Ræktunarmarkmiðin eru mismunandi eftir hestakynum og eru þau mjög breytileg eftir því til hvers er vænst af hestinum. Á að þjálfa hann sem reiðhest, til að draga kerru eða til að keppa t.d. í hindrunastökki eða hest sem hentar börnum. Hjá sumum hestategundum þarf hesturinn að uppfylla ákveðnar kröfur, svo hægt sé að skrá hestinn í ættbók, svo hægt verði að samþykkja hann í ræktun.  Þetta geta verið kröfur um stærð, gerð, lit, hreyfingar og margt fleira. 

Íslenski hesturinn er mjög hraustur, sterkur og fótviss. Hann þolir vel veðurfarið á Íslandi á veturnar, þar sem getur orðið mjög kalt. Hestakynin eru flokkuð í mismunandi og marga flokka.